Qirg‘iziston yurak-qon tomir jarrohligi janubiy mintaqaviy ilmiy markazi jarrohlari elektr energiyasi o‘chgani tufayli yurak operatsiyasini mobil telefonlar yorug‘ligi ostida amalga oshirishga majbur bo‘ldi. Bu haqda “RIA Novosti”ga tayanib “Noviy vek” xabar berdi.
10-oktabr kuni ushbu markaz professori Kaldarbek Abdurahmonov o‘zining Facebook’dagi sahifasiga “ochiq” yurak operatsiyasi aks etgan videolavhani joyladi. Shifoxonadagi elektr ta’minoti uzib qo‘yilgani tufayli jarrohlik amaliyoti mobil telefonlar va fonarlar yorug‘ligi yordamida bajarildi.
Professor video ilova qilingan postida o‘z harakatlarini qahramonlik deb hisoblamasligini, biroq operatsiya stolidagi bemorlarning hayoti bunday sharoitda xavf ostida bo‘lishini ta’kidlagan. “Bizga ish uchun zarur sharoitlar yaratilishini yana qancha kutishimiz kerak?” — deya qayd etgan u.
Avvalroq Qirg‘iziston Vazirlar mahkamasi respublika energetikasi inqiroz yoqasida ekanini ma’lum qilgan, bunga yilning qurg‘oqchil kelganini sabab qilgan edi. Mahkama elektr energiyasi iste’molini 30 foizga cheklash zarurligini ta’kidlagan va kelayotgan qishda respublikadagi barcha iste’molchilarda elektr bilan isitadigan har qanday qurilmalarni o‘chirib, plombalab qo‘yish haqida qaror chiqarilgan edi.
Izoh (0)