Қирғизистон юрак-қон томир жарроҳлиги жанубий минтақавий илмий маркази жарроҳлари электр энергияси ўчгани туфайли юрак операциясини мобил телефонлар ёруғлиги остида амалга оширишга мажбур бўлди. Бу ҳақда «РИА Новости»га таяниб «Новый век» хабар берди.
10 октябрь куни ушбу марказ профессори Калдарбек Абдураҳмонов ўзининг Facebook’даги саҳифасига «очиқ» юрак операцияси акс этган видеолавҳани жойлади. Шифохонадаги электр таъминоти узиб қўйилгани туфайли жарроҳлик амалиёти мобил телефонлар ва фонарлар ёруғлиги ёрдамида бажарилди.
Профессор видео илова қилинган постида ўз ҳаракатларини қаҳрамонлик деб ҳисобламаслигини, бироқ операция столидаги беморларнинг ҳаёти бундай шароитда хавф остида бўлишини таъкидлаган. «Бизга иш учун зарур шароитлар яратилишини яна қанча кутишимиз керак?» — дея қайд этган у.
Аввалроқ Қирғизистон Вазирлар маҳкамаси республика энергетикаси инқироз ёқасида эканини маълум қилган, бунга йилнинг қурғоқчил келганини сабаб қилган эди. Маҳкама электр энергияси истеъмолини 30 фоизга чеклаш зарурлигини таъкидлаган ва келаётган қишда республикадаги барча истеъмолчиларда электр билан иситадиган ҳар қандай қурилмаларни ўчириб, пломбалаб қўйиш ҳақида қарор чиқарилган эди.
Изоҳ (0)