Сьерра-Леонедаги миллий карантин давомида Эбола вируси туфайли вафот этган 92 кишининг жасади топилди. Korrespondent.net Reutersга таяниб ёзишича, касалликни юқтирган яна 56 киши аниқланган.
Карантин чоғида 30 минг нафар кўнгиллилар аҳолига вирусни юқтирмаслик йўлларини тушунтириб, гигиенани таъминлаш учун 1,5 миллионта совун тарқатди. Reuters манбаси берган маълумотга кўра, карантин узайтирилиши мумкин.
Касалликни юқтирмасликнинг асосий қоидаларидан бири беморлар ва вафот этганларга тегмасликдир. Диний анъаналар жасадни ювишни кўзда тутади, шу туфайли кўпчилик аҳоли махсус дафн жамоасини чақиришдан аввал бу ишни амалга оширади, натижада вирусни юқтириб олади.
Эбола вируси туфайли юзага келадиган касаллик эпидемияси Ғарбий Африкада 2,6 мингдан зиёд кишини ҳаётдан олиб кетди, яна 5 мингдан ортиқ киши у билан касалланди. Касалланиш ва ўлим ҳолатларининг деярли барчаси Либерия, Сьерра-Леоне ва Гвинеядан иборат уч давлатга тўғри келади.
Эслатиб ўтамиз, Сьерра-Леоне давлатида 18—21 сентябрь кунлари тўрт кунлик умуммиллий карантин эълон қилинди. Бу вақт давомида одамларга кучли зарурат туғилмаса, уйдан ташқарига чиқмаслик тавсия этилди.
Изоҳ (0)