Европа тикланиш ва тараққиёт банки (ЕТТБ) Ўзбекистон ялпи ички маҳсулоти 2014 йилда 7,5 фоизга ўсиши ҳақидаги прогнозини сақлаб қолди, дея хабар бермоқда «Новый век» нашри. Банк бундан аввал май ойида шундай прогнозини маълум қилган эди.
ЕТТБ мутахассислари ҳисоб-китобларига кўра, Ўзбекистон иқтисодиётининг ўсиш даражаси 2015 йилда 7,6 фоизга тенг бўлади.
Бундан ташқари, улар 2014 йилда Ўзбекистондаги инфляция даражаси 11,4 фоизни ташкил этишини тахмин қилмоқда. 2013 йилда ушбу кўрсаткич 11,2 фоизга тенг бўлган.
ЕТТБнинг таъкидлашича, Россиядаги вазият Ўзбекистон ва Марказий Осиёдаги бошқа давлатларнинг иқтисодий тараққиётига таъсир кўрсатади. Хусусан, Россиядан Ўзбекистонга пул ўтказмалари ҳажми жорий йилда қисқармоқда, бу эса республикадаги истеъмолчилар талабини сезиларли равишда секинлаштириши мумкин.
Нашрнинг эслатишича, аввалроқ Ўзбекистон ҳукумати ЯИМ 2014 йилда 8,1 фоизга ўсишини прогноз қилган эди.
Изоҳ (0)