22-avgustga o‘tar kechasi Misr hududidagi Sinay yarim orolida ikkita sayyohlik avtobusi to‘qnashib ketdi. Natijada 38 kishi halok bo‘ldi, yana 41 kishi jarohat oldi, deya xabar bermoqda “RIA Novosti” Misrning “Al-Ahram” gazetasiga tayanib.
Yo‘l-transport hodisasi sayyohlar orasida mashhur bo‘lgan Sharm ash-Shayx kurortidan 50 kilometr uzoqlikda sodir bo‘lgan. Dastlabki ma’lumotlarga ko‘ra, avtobuslardan birining haydovchisi rulni boshqarayotib uxlab qolgan, oqibatda to‘qnashuv yuz bergan. Zarba kuchliligidan avtobuslarning biri ag‘darilib ketgan.
Janubiy Sinay provinsiyasi sog‘liqni saqlash vazirligi vakili Muhammad Lashinning aytishicha, qutqaruvchilar kechasi bilan halok bo‘lgan yo‘lovchilar jasadlarini avtobuslardan olib chiqqan. Voqea joyiga 30 ga yaqin “tez yordam” mashinasi yuborilgan.
Provinsiya “tez yordam” xizmati direktori Xolid Abu Hoshim so‘zlariga ko‘ra, qurbonlar orasida to‘rt nafar xorij fuqarolari — ukrainalik yosh qiz, Saudiya Arabistonidan kelgan ona va bola hamda Yaman fuqarosi bo‘lgan.
Jarohat olganlarning barchasi yaqin oradagi kasalxonalarga yotqizilgan. Ayni paytda YTH sodir bo‘lgan trassa yopib qo‘yilgan. Politsiya tergov tadbirlarini olib bormoqda.
Izoh (0)