Rossiya prezidenti Vladimir Putin amerikalik aktyor Vin Dizelning muzdek suvda cho‘milish taklifidan xabardor ekanligi amri mahol. Bu haqda prezident matbuot kotibi Dmitriy Peskov ma’lum qildi. Rossiya rahbarining Vin Dizel chaqirig‘iga javob berish-bermasligi haqida matbuot kotibi “ma’lumotga ega emas”.
“Bizning kun tartibimizda boshqa rejalar bor”, — deya ta’kidladi Peskov.
Eslatib o‘tamiz, 19-avgust kuni Vin Dizel Ice Bucket Challenge (“Bir chelak muzdek suv sinovi”) dunyo xayriya onlayn-fleshmobida ishtirok etib, Rossiya prezidenti Vladimir Putin, AQSh birinchi xonimi Mishel Obama va aktrisa Anjelina Joliga chaqiriq yo‘lladi.
Ushbu aksiyaga ko‘ra mashhur insonlar o‘z ustidan muzdek suv quyib, do‘stlariga shunday qilishni yoki xayriya jamg‘armasiga pul o‘tkazishni taklif qilishi lozim. Hozirga qadar Facebook asoschisi Mark Sukerberg, Microsoft asoschisi Bill Geyts hamda Apple kompaniyasining rahbari Tim Kuk, futbolchilardan Ronaldu va Dani Alvesning tadbir ishtirokchilariga aylanganini ma’lum qilgan edik.
Xayriyadan tushadigan mablag‘ amiotrofik skleroz — Lu Gerig kasalligiga chalinganlarga sarflanadi. Bu kasallik odamning bosh miya tizimiga ta’sir qilib, keyinchalik falajlikka olib kelishi mumkin.
Izoh (0)