Argentinadagi yo‘l-transport hodisasida Rim papasining uch qarindoshi halok bo‘ldi

Rim papasi Fransiskning uch nafar qarindoshi Argentinaning Kordova provinsiyasidagi yo‘l-transport hodisasida halok bo‘ldi, deya xabar berdi “ITAR-TASS” mahalliy politsiya vakillariga tayanib.

Politsiya ma’lumotlariga ko‘ra, Rim-katolik cherkovi rahbarining jiyani o‘z oilasi bilan ketayotgan avtomobil yuk mashinasiga kelib urilgan. Jiyanining rafiqasi va ikki farzandi o‘sha zahotiyoq jon bergan. Tirik qolgan erkakning ahvoli esa shifokorlar tomonidan og‘ir deb baholanmoqda.

Dastlabki ma’lumotlarga ko‘ra, oila ta’tildan Buenos-Ayresdagi o‘z uylariga qaytayotgan bo‘lgan.

Nashrning eslatishicha, Rim-katolik cherkovi rahbari lavozimini egallashidan avval Fransisk Buenos-Ayres arxiyepiskopi bo‘lgan.