Саакашвилининг оиласи собиқ президентнинг кийимларини Грузия ҳукуматига жўнатди

Грузия собиқ президенти Михаил Саакашвилининг оиласи мамлакат ҳукуматига унинг, грузин прокуратураси фикрича, давлат пулларига сотиб олинган кийимларини почта орқали юборди. Бу ҳақда Грузия телеканалларига таяниб «РИА Новости» хабар берди.

Хабар қилинишича, сешанба куни тонгда курьер ҳукумат маъмурияти биносига почта жўнатмасини келтирган. Унда «Жаноб Иванишвили, буни ўз ихтиёрингизга кўра ишлатиш учун қайтармоқдаман», — деган ёзув бўлган. Қабул бўлимида жўнатмани олишмади ва буни улар фақат расмий хатларни қабул қилиш ҳуқуқига эга эканликлари билан изоҳлашди. Шунга қарамай, курьер жўнатмани ҳукумат канцелярияси қабулхонасида қолдирди.

Ўтган ҳафта Грузия бош прокуратураси Михаил Саакашвилига давлат маблағлари камомади бўйича айблов эълон қилган эди. Бунда гап давлатга тегишли пулларнинг шахсий эҳтиёжлар учун сарфлаб юборилгани ҳақида бормоқда. Давлат ҳисобидан тўланган шахсий хизматлар рўйхатида Лондонда сотиб олинган 28,6 минг долларлик еттита пиджак ва кашмири пальто, шунингдек 4,6 минг долларлик қўлда тикилган иккита костюм ҳам бўлган. Грузия телевидениеси хабарига кўра, Саакашвили оиласи ҳукумат маъмуриятига кашмири пальто ва еттита пиджакни юборган.

Аввалроқ Саакашвилининг ўзи Грузияда тўққиз йил президентлик қилиб, мамлакатни бутун дунё билан таништирган, уни машҳур қилган давлат раҳбари давлат ҳисобидан еттита пиджак сотиб олишга ҳаққи борлигини таъкидлаган эди. Саакашвили сўзларига кўра, у ўзининг шахсий пулига қимматбаҳо кийим-кечак харид қила олмасди, чунки унинг оиласида бошқа даромад манбаи бўлмаган.

Ўз навбатида Грузия прокуратураси Саакашвилининг бошқа катта харажатлари рўйхатини ҳам эълон қилди ва далил сифатида баъзи чекларнинг сканерланган нусхаларини илова қилди.

Айбловлар тасдиқланган ҳолда, Саакашвили 7 йилдан 11 йилгача озодликдан маҳрум этилиши мумкин.

Саакашвилининг қаердалиги ҳозирча номаълум. У ўтган йилнинг ноябрида бўлиб ўтган янги президент инаугурациясидан кейин шошилинч тартибда Грузияни тарк этган, шундан буён унга қарши учта жиноят иши очилгани сабабли, Саакашвили ватанига қайтишдан ҳайиқмоқда.