AQSh Suriya kimyoviy qurollarini yo‘q qilish bo‘yicha ishlarni yakunladi, deya xabar berdi Gazeta.ru Pentagon bayonotiga tayanib.
Pentagon kontr-admirali Jon Kirbi bayonotda kimyoviy qurolni yo‘q qilish bo‘yicha operatsiya xavfsizlikka qat’iy rioya qilgan holda yuqori professional darajada o‘tganini ta’kidladi. Uning so‘zlariga ko‘ra, operatsiya chog‘ida atrof-muhitga ziyon yetmagan.
Ta’kidlash joiz, kimyoviy qurol O‘rta Yer dengizidagi Amerikaning Cape Ray ixtisoslashgan kemasida yo‘q qilindi. Jarayon 7-iyul kuni boshlangan va uni yakunlashga 60 kun talab etilishi taxmin qilingan edi.
Eslatib o‘tamiz, 2013-yilning avgustida Damashq yaqinida kimyoviy qurol ishlatilishi natijasida bir yarim ming kishi halok bo‘lgach, AQSh Suriyaga hujum uyushtirish harakatiga tushib qolgan edi. Rossiya esa Suriyaning kimyoviy qurollarini xalqaro nazoratga taqdim etish g‘oyasi bilan chiqqan edi.
BMT Xavfsizlik Kengashi (XK) 28-sentabr kuni Suriyaning kimyoviy qurolini yo‘q qilish haqida rezolyutsiya qabul qildi. Suriya prezidenti Bashar Asad XKning ushbu rezolyutsiyasiga bo‘ysunishga tayyorligini bildirdi.
Izoh (0)