Россия президенти Владимир Путин америкалик актёр Вин Дизелнинг муздек сувда чўмилиш таклифидан хабардор эканлиги амри маҳол. Бу ҳақда президент матбуот котиби Дмитрий Песков маълум қилди. Россия раҳбарининг Вин Дизель чақириғига жавоб бериш-бермаслиги ҳақида матбуот котиби «маълумотга эга эмас».
«Бизнинг кун тартибимизда бошқа режалар бор», — дея таъкидлади Песков.
Эслатиб ўтамиз, 19 август куни Вин Дизел Ice Bucket Challenge («Бир челак муздек сув синови») дунё хайрия онлайн-флэшмобида иштирок этиб, Россия президенти Владимир Путин, АҚШ биринчи хоними Мишель Обама ва актриса Анжелина Жолига чақириқ йўллади.
Ушбу акцияга кўра машҳур инсонлар ўз устидан муздек сув қуйиб, дўстларига шундай қилишни ёки хайрия жамғармасига пул ўтказишни таклиф қилиши лозим. Ҳозирга қадар Facebook асосчиси Марк Цукерберг, Microsoft асосчиси Билл Гейтс ҳамда Apple компаниясининг раҳбари Тим Кук, футболчилардан Роналду ва Дани Альвеснинг тадбир иштирокчиларига айланганини маълум қилган эдик.
Хайриядан тушадиган маблағ амиотрофик склероз — Лу Гериг касаллигига чалинганларга сарфланади. Бу касаллик одамнинг бош мия тизимига таъсир қилиб, кейинчалик фалажликка олиб келиши мумкин.
Изоҳ (0)