BMT Bosh kotibi Pan Gi Mun AQSh hukumatini Missuri shtati Fergyuson shahrida 18 yoshli Maykl Braun o‘limi munosabati bilan o‘tkazilayotgan tinch namoyishlarda fuqarolar huquqlari va so‘z erkinligini himoya qilishga chaqirdi. Bu haqda BMT rasmiy vakili Stefan Dujarrik bayonotiga tayanib, “RIA Novosti” xabar berdi.
“Bosh kotib hukumatni tinch namoyishlar o‘tkazish va fikrni erkin ifoda etish huquqlari himoya qilinishini ta’minlashga da’vat etadi”, — dedi Dujarrik. Uning so‘zlariga ko‘ra, Pan Gi Mun shuningdek “barchani bosiqlikka chaqirmoqda, tartib soqchilaridan esa namoyishchilar bilan muomala qilishning amerikacha va xalqaro me’yorlariga rioya etishni so‘ramoqda”.
Dujarrik aytishicha, Pan Gi Mun “mahalliy va federal tergovchilar ushbu qotillikni aniqlashtirishi va natijada adolat qaror topishiga umid qilib qoladi”.
Eslatib o‘tamiz, 9-avgust kuni Fergyuson shahrida 18-yoshli Maykl Braun ismli qora tanli yigit politsiyachilar tomonidan otib o‘ldirildi. Shundan so‘ng shaharda ommaviy namoyishlar va tartibsizliklar boshlanib ketgan. Politsiya ularga qarshi rezina o‘q va ko‘zni yoshlantiruvchi gaz qo‘llamoqda.
Izoh (0)