Xitoy hayvonot bog‘ida dunyodagi ilk uch egizak pandalar tug‘ildi

Xitoyning Guanchjou shahrida joylashgan Chamelun safari-parkida Szyuysyao laqabli katta panda 29-iyul kuni uch egizakni dunyoga keltirgan edi. Ayni paytda butun dunyo ularni kuzatishda davom etmoqda, deya xabar bermoqda Gazeta.ru.

Nashrning ta’kidlashicha, katta pandalar juda kamdan-kam hollarda ko‘payadi, shuning uchun ayni vaziyatda sun’iy urug‘lantirish usuliga murojaat qilishga to‘g‘ri kelgan.

“Bu tarixda yagona omon qolgan uch egizak pandalar deb hisoblanmoqda”, — deyiladi hayvonot bog‘i bayonotida.

Volun milliy tabiiy qo‘riqxonasi ekspertlari fikricha, pandachalar ‘omon qolgan’ deb hisoblash uchun hali juda yoshdir. Buning uchun jonivorlar olti oylikka to‘lishi kerak. Biroq mutaxassislar ular ayni paytda haqiqatan ham yagona uch egizak pandalar ekanini tasdiqladi.