Germaniya Federativ Respublikasi razvedkasi AQSh davlat kotibi Jon Kerrining telefon suhbatini tasodifan tutib oldi, deya xabar berdi “RIA Novosti” Germaniya OAVlariga tayanib.
Aniqlanishicha, Kerrining suhbati 2013-yilda u sun’iy yo‘ldosh telefoni orqali gaplashayotgan vaqtda Germaniya Federal razvedka xizmati tomonidan yozib olingan. Spiegel nashri yozishicha, suhbat umuman boshqa operatsiyani o‘tkazish doirasida tasodifan yozib olingan.
Nashrning eslatishicha, Germaniya tomonidan yuqori mansabli amerikalik siyosatchilarning “tasodifan” tinglanishi bilan bog‘liq bunday voqea 2012-yilda ham sodir bo‘lgan. O‘shanda amaldagi AQSh davlat kotibi Hillari Klinton va BMTning o‘sha paytdagi bosh kotibi Kofi Annan suhbati yozib olingan.
Eslatib o‘tamiz, iyul oyida AQSh maxsus xizmatlari bilan hamkorlik qilishda gumon etilgan ikki nafar Germaniya fuqarosi fosh qilingan edi. Shundan so‘ng Amerikaning GFRdagi elchixonasi qoshidagi AQSh qarorgohi rahbari mamlakatdan chiqarib yuborilgan.
Izoh (0)