Malayziya politsiyasi bank xizmatchisi bo‘lgan ayol va uning erini hibsga oldi, ular yo‘qolgan “Boing” yo‘lovchilari hisoblaridan pul o‘g‘irlaganlikda gumon qilinmoqda, deya xabar berdi Vesti.ru. Gap shu yil martida Hind okeani ustidan uchib o‘tayotib yo‘qolib qolgan Malaysia Airlines samolyoti haqida bormoqda.
Er-xotinlar shum taqdirli “Boing” bortida bo‘lgan yo‘lovchilar hisoblaridan 35 ming dollar o‘marganlikda gumon etilmoqda. Bankda 10 yildan buyon ishlab kelgan ayol 14-avgust kuni o‘z uyida qo‘lga olingan. Uning 33 yoshli turmush o‘rtog‘i esa mashinasini ta’mirlatish uchun olib kelgan ustaxonada hibsga olingan.
Bu ishda erkakning ham qo‘li borligini taxmin qilinmoqda. “Politsiya videokuzatuv kameralaridagi yozuvlarni o‘rganib chiqishi kerak, bunga biroz vaqt ketadi”, — dedi politsiya vakili.
Aniqlik kiritilishicha, bank xodimasi ruxsatsiz uch yo‘lovchi va bir ekipaj a’zosi hisobidan pul yechib olgan. Yo‘lovchilarning ikki nafari Xitoy fuqarolaridir. To‘rtala kishi ham bitta xalqaro bankda hisobga ega bo‘lgan.
Ushbu bankning mijozlarga xizmat ko‘rsatish bo‘yicha menejeri 18-iyul kuni omonatchilardan birining mablag‘lari bilan bog‘liq shubhali harakatni sezib qolgan. 2-avgustda tegishli xabar politsiyaga kelib tushgan. Tergov-qidiruv ishlari uchta hisobdagi pullar bitta hisobga o‘tkazilgani va bir nechta bankomatlar orqali naqd pul sifatida yechib olinganini ko‘rsatgan. Hibsdan sal avvalroq bank xodimasi yangi bank kartochkasini olgan, aynan o‘sha kartochka yordamida u pullarni yechib olgan.
Eslatib o‘tamiz, Malaysia Airlines’ga qarashli Boeing 777-200ER samolyoti 8-mart kuni Kuala-Lumpurdan Pekinga parvoz etayotib, radarlardan yo‘qolib qolgan. U Malayziya va Vyetnam chegarasini kesib o‘tganidan keyin bir necha daqiqa vaqt o‘tgach, aloqa uzilgan. Bevosita g‘oyib bo‘lishidan avval undan olingan xabarda biror muammo haqida gap ham bo‘lmagan. Samolyot bortida 12 nafar ekipaj a’zolari bilan birga jami 239 kishi bo‘lgan.
Izoh (0)