Indoneziya politsiyasi dahshatli o‘lim hodisasi bo‘yicha tergov ishlarini olib bormoqda. Bo‘laklangan ayol jasadi Bali orolidagi mehmonxonalardan biri hududida jomadon ichidan topilgan. Qotillikda gumon qilinib ayolning 19 yoshli qizi va qizning 21 yoshli do‘sti hibsga olindi. USA Today xabar berishicha, qo‘lga olingan qiz homilador bo‘lib chiqqan.
Amerikalik Sheyla fon Vize-Mak ismli ayol murdasi mehmonxona hududida to‘xtab turgan taksi yukxonasidan topilgan. Jasad bo‘laklangan va jomadonga joylangan edi. Dahshatli topilmadan bir kun o‘tib, ayolning qizi va uning do‘sti qo‘lga olingan. Guvohlar ko‘rsatmalaridan kelib chiqib, huquq muhofazachilari ularga ayblov e’lon qildi.
Politsiya ma’lumotiga ko‘ra, yoshlar taksi chaqirishgan, mashina yetib kelgach, yukxonaga jomadon ortishgan. Ular haydovchidan kutib turishni so‘rashgan, biroq shu bilan qaytib kelishmagan. Mehmonxona soqchilari zinalarda qon izlarini ko‘rib, haydovchiga to‘g‘ri politsiya uchastkasiga borishni taklif qilishdi. U yerda politsiyachilar jomadonda o‘ldirilgan ayol qoldiqlarini topishgan.
Yoshlar politsiyaga keltirilgach, ular ayolning qandaydir o‘g‘rilar tomonidan o‘ldirilganini aytishgan. Biroq taksichi va mehmonxona xodimlari boshqacha ko‘rsatmalar bergan.
Keyinroq ma’lum bo‘lishicha, 62 yoshli amerikalik ayol va uning qizi mehmonxonaga 9-avgust kuni yetib kelgan, yigit esa ikki kundan so‘ng kelgan. Yigit va ayol o‘rtasida janjal sodir bo‘lgan, bu mehmonxona foyesidagi videokuzatuv kamerasiga muhrlangan.
Ayolning jasadini ekspertizadan o‘tkazgan mutaxassislar uning o‘lim oldidan tana jarohatlari olganini aniqlashdi. Bilagidagi chandiqlar va singan tirnoqlari uning qotilga qarshilik ko‘rsatganidan darak berishi aytildi.
Pirovardida qiz onasining o‘lganini tasdiqladi, biroq o‘lim sababini aytishdan bosh tortdi. U Baliga onasi bilan 4-avgust kuni kelgani va boshqa mehmonxonaga tushgani ma’lum bo‘ldi. Nima uchun mehmonxonani almashtirishgani haqida ham qiz so‘zlab bermadi. Unga mahalliy advokat yollandi. Yigit esa AQShdan o‘zining huquqshunosi kelishini aytdi. Huquq muhofazachilari so‘zlariga ko‘ra, yoshlar tergovga ko‘mak berish istagida emas va ko‘p savollarga javob qilishdan bosh tortmoqda.
Shu bilan birga, Chikago politsiyasi ona va qiz yashagan uyga 2004—2013-yillar davomida 86 marta chaqiruv bo‘yicha borgani aniqlandi. Chaqiruvlar ko‘pincha maishiy janjallar, odam yo‘qolishi yoki mayda o‘g‘riliklar bo‘yicha bo‘lgan. Ularning hech qaysi biri hibs bilan tugamagan. Qurbonning tanishlari jurnalistlarga u va qizi o‘rtasida doimiy kelishmovchiliklar bo‘lib turganini aytib berdi.
Izoh (0)