14-avgust, payshanba kuni Donetsk artilleriyadan shiddatli ravishda o‘qqa tutildi. Shahar kengashi ma’lumotlariga ko‘ra, tinch aholining kamida ikki vakili halok bo‘lgan, deya xabar berdi Euronews.
Viloyat sog‘liqni saqlash departamenti axboroti bo‘yicha, so‘nggi uch sutka ichida jangovar harakatlar natijasida kamida 74 kishi halok bo‘lgan.
Payshanbaga o‘tar kechasi Budyonnovsk tumani va Mospino aholi punkti artilleriyadan o‘qqa tutilgan.
Bu vaqtda esa “Lugansk xalq respublikasi” rahbari Valeriy Bolotov vaqtinchalik iste’foga chiqishga qaror qildi. Bunga uning aytishicha, olgan jarohati sabab bo‘lgan. Bolotov uning lavozimini ayirmachilar hukumati mudofaa vaziri Igor Plotnitskiy egallashi mumkinligini aytdi. O‘tgan hafta “Donetsk xalq respublikasi” bosh vaziri Aleksandr Boroday ham o‘z lavozimini tark etgan edi.
Eslatib o‘tamiz, BMT shu hafta boshida Ukraina janubi-sharqidagi nizolar qurbonlari soni 2086 kishiga yetganini xabar berdi. Aprel o‘rtasidan buyon Donetsk va Lugansk viloyatlarida har oyda o‘rtacha 60 kishi halok bo‘lmoqda. To‘rt oy ichida 5 mingdan ortiq kishi yaralangan.
Izoh (0)