Малайзия полицияси банк хизматчиси бўлган аёл ва унинг эрини ҳибсга олди, улар йўқолган «Боинг» йўловчилари ҳисобларидан пул ўғирлаганликда гумон қилинмоқда, дея хабар берди Vesti.ru. Гап шу йил мартида Ҳинд океани устидан учиб ўтаётиб йўқолиб қолган Malaysia Airlines самолёти ҳақида бормоқда.
Эр-хотинлар шум тақдирли «Боинг» бортида бўлган йўловчилар ҳисобларидан 35 минг доллар ўмарганликда гумон этилмоқда. Банкда 10 йилдан буён ишлаб келган аёл 14 август куни ўз уйида қўлга олинган. Унинг 33 ёшли турмуш ўртоғи эса машинасини таъмирлатиш учун олиб келган устахонада ҳибсга олинган.
Бу ишда эркакнинг ҳам қўли борлигини тахмин қилинмоқда. «Полиция видеокузатув камераларидаги ёзувларни ўрганиб чиқиши керак, бунга бироз вақт кетади», — деди полиция вакили.
Аниқлик киритилишича, банк ходимаси рухсатсиз уч йўловчи ва бир экипаж аъзоси ҳисобидан пул ечиб олган. Йўловчиларнинг икки нафари Хитой фуқароларидир. Тўртала киши ҳам битта халқаро банкда ҳисобга эга бўлган.
Ушбу банкнинг мижозларга хизмат кўрсатиш бўйича менежери 18 июль куни омонатчилардан бирининг маблағлари билан боғлиқ шубҳали ҳаракатни сезиб қолган. 2 августда тегишли хабар полицияга келиб тушган. Тергов-қидирув ишлари учта ҳисобдаги пуллар битта ҳисобга ўтказилгани ва бир нечта банкоматлар орқали нақд пул сифатида ечиб олинганини кўрсатган. Ҳибсдан сал аввалроқ банк ходимаси янги банк карточкасини олган, айнан ўша карточка ёрдамида у пулларни ечиб олган.
Эслатиб ўтамиз, Malaysia Airlines’га қарашли Boeing 777-200ER самолёти 8 март куни Куала-Лумпурдан Пекинга парвоз этаётиб, радарлардан йўқолиб қолган. У Малайзия ва Вьетнам чегарасини кесиб ўтганидан кейин бир неча дақиқа вақт ўтгач, алоқа узилган. Бевосита ғойиб бўлишидан аввал ундан олинган хабарда бирор муаммо ҳақида гап ҳам бўлмаган. Самолёт бортида 12 нафар экипаж аъзолари билан бирга жами 239 киши бўлган.
Изоҳ (0)