Keyingi paytlarda Facebook ijtimoiy tarmog‘ining o‘zbek tilli foydalanuvchilari ancha faollashganligiga ko‘p guvoh bo‘lmoqdamiz. Buni, jumladan, “Xorazm va xorazmliklar” guruhi hamda uning negizida yaratilgan “Olam aro Xorazm va Xorazmliklar” hamjamiyati misolida ham ko‘rish mumkin.
Guruh qoidalarida ta’kidlanishicha, unda mazkur voha, uning tabiati, yodgorliklari, xalqi va urf-odatlari kabilar xususida fikr almashiladi. “Xorazm va xorazmliklar”ga (qayerlik ekanligidan qat’iy nazar) mazkur o‘lka bilan qiziquvchilar qabul qilinadi. Muloqot o‘zbek va rus tillarida, shuningdek, xorazmcha shevada olib boriladi.
“Olam aro Xorazm va Xorazmliklar” hamjamiyati esa ayni shu guruhga tegishli bo‘lib, u yaxshi bir tashabbus boshlagan: dunyoning turli burchaklarida o‘qiyotgan, ishlayotgan xorazmliklar o‘sha yerlarda milliy liboslar bilan, shuningdek, vatanga, yuqoridagi guruh va hamjamiyatga daxldor belgilar bilan suratga tushib, ularni sahifaga joylamoqda.
Shulardan birinchisi Moskvada, Kremlda olingan suratlar bo‘ldi.
Dunyo shaharlarida “Xorazm va xorazmliklar” yozuvi bilan suratga tushish estafetasi hozirgacha Parijning Eyfel minorasi, “Mulen Ruj” (“Qizil tegirmon”) kabaresi, Filadelfiyadagi “Muhabbat bog‘i” va Markaziy xiyobonda, Nyu-Yorkning Manxetten qismida davom ettirib kelinmoqda.
Shuningdek, O‘zbekistonning o‘zida, xususan, Xorazmda ham shu yozuv bilan tushirilgan suratlar guruh hamda sahifaga joylanmoqda.
Xususan, guruh faollari Xiva shahrida joriy yilning 9-avgust kuni o‘tkazilgan Qovun sayli tadbirida ishtirok etib, u yerda tushilgan suratlarni ijtimoiy tarmoqqa joyladi.
Shu kuni faollar va xorijlik sayyohlar bilan birgalikda tushgan rasm esa hamjamiyat sahifasining bosh surati sifatida qo‘yilgan.
Mazkur rasmlarga ko‘plab izohlar yozilgan, ularni o‘z profili sahifasida ulashganlar ham bisyor.
Shuningdek, ayrim foydalanuvchilar xorazmliklarning bu faolligini e’tirof etib, shu kabi guruhlar tashkil qilish istagini bildirgan.
Izoh (0)