Кейинги пайтларда Facebook ижтимоий тармоғининг ўзбек тилли фойдаланувчилари анча фаоллашганлигига кўп гувоҳ бўлмоқдамиз. Буни, жумладан, «Хоразм ва хоразмликлар» гуруҳи ҳамда унинг негизида яратилган «Олам аро Хоразм ва Хоразмликлар» ҳамжамияти мисолида ҳам кўриш мумкин.
Гуруҳ қоидаларида таъкидланишича, унда мазкур воҳа, унинг табиати, ёдгорликлари, халқи ва урф-одатлари кабилар хусусида фикр алмашилади. «Хоразм ва хоразмликлар»га (қаерлик эканлигидан қатъий назар) мазкур ўлка билан қизиқувчилар қабул қилинади. Мулоқот ўзбек ва рус тилларида, шунингдек, хоразмча шевада олиб борилади.
«Олам аро Хоразм ва Хоразмликлар» ҳамжамияти эса айни шу гуруҳга тегишли бўлиб, у яхши бир ташаббус бошлаган: дунёнинг турли бурчакларида ўқиётган, ишлаётган хоразмликлар ўша ерларда миллий либослар билан, шунингдек, ватанга, юқоридаги гуруҳ ва ҳамжамиятга дахлдор белгилар билан суратга тушиб, уларни саҳифага жойламоқда.
Шулардан биринчиси Москвада, Кремлда олинган суратлар бўлди.
Дунё шаҳарларида «Хоразм ва хоразмликлар» ёзуви билан суратга тушиш эстафетаси ҳозиргача Парижнинг Эйфель минораси, «Мулен Руж» («Қизил тегирмон») кабареси, Филадельфиядаги «Муҳаббат боғи» ва Марказий хиёбонда, Нью-Йоркнинг Манхеттен қисмида давом эттириб келинмоқда.
Шунингдек, Ўзбекистоннинг ўзида, хусусан, Хоразмда ҳам шу ёзув билан туширилган суратлар гуруҳ ҳамда саҳифага жойланмоқда.
Хусусан, гуруҳ фаоллари Хива шаҳрида жорий йилнинг 9 август куни ўтказилган Қовун сайли тадбирида иштирок этиб, у ерда тушилган суратларни ижтимоий тармоққа жойлади.
Шу куни фаоллар ва хорижлик сайёҳлар билан биргаликда тушган расм эса ҳамжамият саҳифасининг бош сурати сифатида қўйилган.
Мазкур расмларга кўплаб изоҳлар ёзилган, уларни ўз профили саҳифасида улашганлар ҳам бисёр.
Шунингдек, айрим фойдаланувчилар хоразмликларнинг бу фаоллигини эътироф этиб, шу каби гуруҳлар ташкил қилиш истагини билдирган.
Изоҳ (0)