AQSh davlat departamenti Snoudenga Rossiyada istiqomat uchun guvohnoma berilganidan norozi bo‘ldi

AQSh davlat departamentida Edvard Snoudenga Rossiyada uch yil muddatga istiqomat uchun guvohnoma berilganiga nisbatan norozilik bildirishdi va yana uning vataniga qaytishi kerakligini ta’kidlashdi. Bu haqda “ITAR-TASS” xabar berdi.

Davlat departamentining rasmiy vakili Mari Xarf AQShning Snoudenga munosabati avvalgi holicha qolganini aytdi. “Biz u qaytib kelib, o‘z xatti-harakatlari uchun javob berishi kerak, deb o‘ylaymiz”, — dedi u.

“Rossiya qilgan ishga qat’iy norozilik bildirishdan boshqa narsa qo‘limizdan kelishiga ishonchim komil emas”, — deya ta’kidladi davlat departamenti vakili.

Eslatib o‘tamiz, 7-avgust kuni AQSh maxsus xizmatlari sobiq xodimi Edvard Snouden uch yil muddatga Rossiya Federatsiyasida istiqomat uchun guvohnomaga ega bo‘ldi. Bundan avval u Rossiyada vaqtincha boshpana bilan yashagan, uning muddati esa 1-avgust kuni tugagan edi.