Xitoy janubi-g‘arbidagi Yunnan provinsiyasida 3-avgust kuni ro‘y bergan zilzila natijasida halok bo‘lganlarni qidirish ishlari davom etmoqda, deya xabar berdi Euronews.
Tabiiy ofat yuz berganidan 50 soat o‘tib, xarobalar ostidan 88 yoshli ayol qutqarildi. Dastlabki tibbiy ko‘rikdan so‘ng jabrlanuvchining ahvoli barqaror deb baholandi. Avvalroq 76 yoshli yana bir jabrlanuvchi erkak ham xarobalar orasidan qutqarib olingan edi.
So‘nggi ma’lumotlarga ko‘ra, zilzila deyarli 600 kishini hayotdan olib ketdi, 2400 ga yaqin kishiga jarohat yetkazdi. Ofat hududidan 230 ming aholi evakuatsiya qilindi.
Eslatib o‘tamiz, 6,5 magnitudali (ba’zi manbalarda 6,1 magnitudali) zilzila mahalliy vaqt bilan 3-avgust 16:30 da (Toshkent vaqti bilan 3-avgust 13:30 da) bo‘lib o‘tdi. Zilzila o‘chog‘i Chjaotun shahridagi Ludyan uyezdi hududida 12 kilometr chuqurlikda joylashdi. Ushbu uyezdda 265 mingdan ortiq kishi yashaydi. U yerda telefon aloqasi uzilgan, qator binolar buzilgan, elektr uzatish liniyalari zararlangan. Xitoy OAVlari ta’kidlashicha, ushbu zilzila Yunnanda so‘nggi 14 yil ichida yuz bergan eng kuchlisi bo‘ldi.
Izoh (0)