Rasmiy Bishkek Belorussiyadan Qirg‘izistonda oliy jazoga mahkum etilgan Qurmanbek Bakiyevni Xalqlar do‘stligi ordeni bilan mukofotlagani uchun izoh talab qildi. Bu haqda Qirg‘iziston tashqi ishlar vazirligi bayonotiga tayanib, “RIA Novosti” xabar berdi.
Ma’lum bo‘lishicha, Qirg‘iziston TIVga Belorussiya elchisi Viktor Denisenkoni chaqirishgan va ushbu axborot bo‘yicha tushuntirish berishini so‘rashgan. Elchi “eng yaqin vaqt ichida vazirlikni ushbu masala haqida xabardor qilishga” va’da bergan.
Eslatib o‘tamiz, Qirg‘iziston sobiq prezidenti Qurmanbek Bakiyev 2010-yil 7-apreldagi ommaviy qirg‘inni uyushtirishga aloqador deb topilib, mol-mulki musodara qilingan holda umrbod qamoq jazosiga sirtdan hukm qilingan edi.
Avvalroq Qurmanbek Bakiyev Buyuk Britaniya fuqarosi Shon Deyliga suiqasd tashkil qilishda ayblanib 25 yilga ozodlikdan mahrum qilingan edi.
Bakiyev 2005–2010-yillarda prezidentlik qilgan. 2010-yil aprel voqealarida qo‘zg‘olonchilar va hukumat kuchlari o‘rtasidagi to‘qnashuvlarda 80 dan ortiq kishi halok bo‘lgan, yana 300 kishi yaralangan. To‘ntarishdan keyin prezident Aleksandr Lukashenko taklifi bilan Belorussiyaga ketgan. Qirg‘iziston hukumati tepasiga kelgan raqiblari Bakiyevni topshirishni talab etishgan, ammo Belorussiya uni Qirg‘izistonga topshirishdan bosh tortgan.
Izoh (0)