AQShlik mutaxassis bortdagi Wi-Fi signali orqali samolyotni qo‘lga olish mumkinligini isbotladi

IOActive firmasining kiberxavfsizlik bo‘yicha konsultanti 32 yoshli Ruben Santamarta Las-Vegasdagi Black Hat anjumanida nutq so‘zlamoqchi. Unda Ruben tijorat havo yo‘llarida foydalaniladigan sun’iy yo‘ldosh aloqasi yordamida samolyot ustidan nazorat o‘rnatish usulini ko‘rsatib bermoqchi. Bu haqda “RIA Novosti” xabar berdi.

“Samolyotdagi kamchiliklardan foydalanish uchun bir havo kemasidan ikkinchisiga SMS yuborish kifoya”, — deyiladi mutaxassis ma’ruzasida.

Nazariya bo‘yicha, xaker samolyot bortidagi Wi-Fi signali yoki o‘yinlar tizimidan bort radioelektron qurilmasini buzishda foydalanishi mumkin. Natijada sun’iy yo‘ldosh aloqasi ishdan chiqadi yoki o‘zgaradi, bu esa layner navigatsiyasi va xavfsizlik tizimiga ta’sir qiladi.

Santamarta buni maxsus sharoitlarda sinovdan o‘tkazganini qayd etgan. “Dasturiy ta’minot ishlab chiquvchilarini ushbu kamchilikni bartaraf qilishga chaqirish maqsadida o‘z tadqiqotlarimni so‘zlab bermoqchiman”, — deb yozadi u.