IOActive фирмасининг киберхавфсизлик бўйича консультанти 32 ёшли Рубен Сантамарта Лас-Вегасдаги Black Hat анжуманида нутқ сўзламоқчи. Унда Рубен тижорат ҳаво йўлларида фойдаланиладиган сунъий йўлдош алоқаси ёрдамида самолёт устидан назорат ўрнатиш усулини кўрсатиб бермоқчи. Бу ҳақда «РИА Новости» хабар берди.
«Самолётдаги камчиликлардан фойдаланиш учун бир ҳаво кемасидан иккинчисига SMS юбориш кифоя», — дейилади мутахассис маърузасида.
Назария бўйича, хакер самолёт бортидаги Wi-Fi сигнали ёки ўйинлар тизимидан борт радиоэлектрон қурилмасини бузишда фойдаланиши мумкин. Натижада сунъий йўлдош алоқаси ишдан чиқади ёки ўзгаради, бу эса лайнер навигацияси ва хавфсизлик тизимига таъсир қилади.
Сантамарта буни махсус шароитларда синовдан ўтказганини қайд этган. «Дастурий таъминот ишлаб чиқувчиларини ушбу камчиликни бартараф қилишга чақириш мақсадида ўз тадқиқотларимни сўзлаб бермоқчиман», — деб ёзади у.
Изоҳ (0)