Rossiyaning Baykal ko‘li bo‘yidagi Irkutsk shahrida “Oila davrasida” nomli xalqaro teatr va kino festivali 2-avgust, shanba kuni ochildi. Bu haqda “RIA Novosti” axborot agentligiga tayanib, “Kun” xabar bermoqda.
Kinofestivalning asosiy tanlovidan Rossiya, Ukraina, AQSh, Xitoy, Serbiya, Qozog‘iston, O‘zbekiston, Gollandiya va Singapurda suratga olingan filmlar o‘rin olgan. Kinoanjumanni rossiyalik rejissyor Gleb Orlovning “Poddubniy” filmi ochib bergan.
Tanlovda O‘zbekiston nomidan Rashid Malikov o‘zining “Tog‘a” filmi bilan ishtirok etadi. Sovet davrining so‘nggi yillaridagi O‘zbekiston xalqi hayotini hikoya qiluvchi ushbu film premyerasi 2014-yil aprelida bo‘lib o‘tgandi.
Filmda rollarni Bobur Yo‘ldoshev, Boris G‘ofurov, Nigora Karimboyeva, Abbos Nigmanov, Feruza Sobitova, Ali Choriyev, Ra’no Shodiyeva va boshqalar ijro etgan.
Ma’lumot uchun, “Oila davrasida” kinofestivali 2006-yildan beri tashkil etib kelinayotgan bo‘lib, unga turli shaharlar mezbonlik qiladi. Xususan, 2006-yil Kaluga, 2007-yil Moskva, 2008-yil esa Novosibirsk festivalni qabul qilgan. Keyingi besh yil davomida Yekaterinburgda o‘tkazilgan festival 2014-yilda Irkutskka ko‘chdi.
Izoh (0)