Braziliya prezidenti Dilma Russeff mamlakatning futbol bo‘yicha terma jamoasi Germaniya bilan uchrashuvda yirik hisobda mag‘lubiyatga uchraganidan keyin mahalliy aholini qo‘llab-quvvatlash uchun samba yo‘nalishida qo‘shiq kuylab berdi. Bu haqda New York Times’ga tayanib, “RIA Novosti” xabar berdi.
Jahon chempionati musobaqasining dastlabki yarim finalida Braziliya Germaniyaga 1:7 hisobi bilan yengilgan edi. Bunday yirik hisobdagi mag‘lubiyatdan so‘ng Braziliya termasi muxlislari San-Pauluda tartibsizliklar uyushtirgan edi.
Mamlakat prezidentining ba’zi opponentlari Braziliya termasining yengilishi uning oktabda bo‘lib o‘tadigan prezident saylovlaridagi mag‘lubiyati haqida ogohlantirish signali ekanini aytdi. Biroq Russeff ularni futbol va siyosatni aralashtirmaslikka chaqirdi.
Jahon chempionati Braziliyada ommaviy tartibsizliklarni keltirib chiqardi, bu tayyorgarlik ishlariga katta miqdorda xarajatlar jalb etilgani bilan bog‘liqdir. Ular Russeffning obro‘siga putur yetkazmay qolmadi. Biroq yaqinda o‘tkazilgan ijtimoiy so‘rov natijasida mamlakat aholisining katta qismi futbol bo‘yicha jahon birinchiligi aynan Braziliyada o‘tkazilganidan faxrlanishini bildirgan.
Izoh (0)