Rossiyalik FIFA hakami Valeriy Butenko Ravshan Ermatov Braziliyadagi jahon chempionati final uchrashuvini boshqarish uchun har tomonlama to‘g‘ri kelishini aytdi, deb yozadi Sport-express.ru.
Avvalambor uning professional mahoratiga to‘xtalib o‘tar ekan Butenko Ermatovning o‘zi ham futbol bilan shug‘ullanib ko‘rgani, shu tufayli bu o‘yinni chuqur tushunishini ta’kidladi. “Taxminan 18 yoshida jiddiy jarohat tufayli futbolni tark etgach, arbitrlik uchun erta hisoblangan yoshda hakamlik qila boshladi, vaqt o‘tgach haqiqiy professionalga aylandi”, — dedi u.
Rossiyalik arbitr hamyurtimiz ishni muvaffaqiyatli olib borish uchun yetarli darajadagi xususiyatlarga ega ekanligini aytdi va bunda uning yuqori ruhiy bardoshliligi, jismoniy tayyorgarligi, shuningdek arbitrlar uchun aynan mos — 183 santimetrlik bo‘yi hamda ingliz tilini yaxshi bilishini alohida tilga oldi.
“Sportchilarga xos dadilligi unga butun 90 daqiqa davomida sovuqqonlikni saqlab turish va maydondagi vaziyatni kuzatish uchun qulay joy izlashdan charchamaslik imkonini beradi”, — dedi Butenko.
Ermatovdagi ijobiy xislatlarni sanash bilan birga, rossiyalik arbitr undagi kamchiliklarga ham to‘xtalib o‘tdi. “Jismoniy tayyorgarlikning yuqori darajada bo‘lishi hakamlarga ba’zan halaqit ham beradi, — dedi u. — Odatda jamoalardan biri hujum boshlaganida referi ularni oldinga o‘tkazib yuborishi kerak. Biroq hozirgi kunda hakam ular bilan tengma-teng harakatlanib, futbolchilarga xalal berib qo‘yishi mumkin”.
Butenko, umuman olganda, Ravshan Ermatovni finalni boshqarish uchun eng yaxshi nomzod deb bilishini aytdi. “Finalda Germaniya va Argentina o‘ynashi ma’lum bo‘lganidan so‘ng uning imkoniyati yanada ko‘paydi. Agar yarim finalda Gollandiya yutganida, so‘nggi matchga yevropalik arbitr tayinlanishi mumkin edi, — dedi u. — Endi esa osiyolik, buning ustiga o‘ta malakali referi bunday vaziyatda eng ‘qimmatbaho xazina’dir”.
Izoh (0)