Facebook ijtimoiy tarmog‘ida o‘zbekistonlik FIFA referisi Ravshan Ermatovning sahifasi paydo bo‘ldi. Sahifa haqidagi ma’lumotga uning “FIFA arbitri Ravshan Ermatovning rasmiy sahifasi” ekanligi rus tilida ilova qilingan.
Facebook sahifasiga Ravshan Ermatovning jahon chempionatlari va ulardan tashqaridagi suratlari joylangan. Sahifa nomidan hozircha bitta status yozilgan bo‘lib, unda “Men his qilyapmanki, Ravshan bu safar final o‘yinni boshqaradi…” (I can feel it Ravshan is going to referee the finals this time...) deb ingliz tilida yozib qo‘yilgan. Bu bilan “rasmiy sahifa”ni yuritayotgan foydalanuvchi o‘zining Ravshan Ermatov emasligini “fosh qilgan”.
Facebook’dagi ushbu sahifaning Ermatovga daxli bor-yo‘qligini aniqlash uchun referining ukasi Sardor Ermatov bilan bog‘landik. U sahifaning akasiga tegishli emasligini tasdiqladi. “FIFA hakamlariga ijtimoiy tarmoqlarda sahifa ochish tavsiya qilinmaydi, — dedi u. — Bu sahifaning akamga hech qanday aloqasi yo‘q”.
Ikki soatcha avval ochilgan sahifaga hozircha 48 ta “layk” bosilgan. Sahifaning rasmiy emasligini boshqa foydalanuvchilar ham sezmoqda. Ulardan biri “Sahifa soxta o‘xshayapti”, — deya izoh qoldirgan.
Izoh (0)