Kansler Angela Merkel Germaniya fuqarosining AQSh razvedkasi uchun qo‘sh agent bo‘lib ishlagani haqidagi xabarga o‘ta jiddiy qarashini ma’lum qildi. Bu haqda Reuters xabar berdi.

Uning ta’kidlashicha, axborot to‘g‘ri bo‘lib chiqsa, Germaniya hukumati AQSh bilan hamkorlikni shubha ostiga qo‘yishi mumkin. Kansler bunday bayonotni Pekinga tashrif chog‘idagi matbuot anjumanida berdi.

Oq uy va Davlat departamenti hozircha Germaniya tashqi razvedkasining 31 yoshli xodimi hibsga olinishiga nisbatan hech qanday izoh bergani yo‘q.

Eslatib o‘tamiz, OAVda mamlakat razvedka (qidiruv) xizmati xodimining AQSh josusi deb qo‘lga olingani haqida xabar tarqalgach, Germaniya Tashqi ishlar vazirligi Berlindagi AQSh elchisi Jon Emersonni huzuriga chaqirgan edi.

Ayni damda Spiegel hamda Süddeutsche Zeitung nashrlarida gumondor shaxs Germaniya Federal razvedka agentligida ishlagani va AQSh josusi deb ayblanayotgani haqida ma’lumot berildi.  U AQSh Milliy xavfsizlik agentligi tomonidan telefonlarning tinglanishiga doir tergov bilan shug‘ullangan bundestag (Germaniya parlamenti) qo‘mitasi ishlari haqidagi ma’lumotlarni AQShga pul evaziga jo‘natganlikda gumon qilinmoqda.