Канцлер Ангела Меркель Германия фуқаросининг АҚШ разведкаси учун қўш агент бўлиб ишлагани ҳақидаги хабарга ўта жиддий қарашини маълум қилди. Бу ҳақда Reuters хабар берди.
Унинг таъкидлашича, ахборот тўғри бўлиб чиқса, Германия ҳукумати АҚШ билан ҳамкорликни шубҳа остига қўйиши мумкин. Канцлер бундай баёнотни Пекинга ташриф чоғидаги матбуот анжуманида берди.
Оқ уй ва Давлат департаменти ҳозирча Германия ташқи разведкасининг 31 ёшли ходими ҳибсга олинишига нисбатан ҳеч қандай изоҳ бергани йўқ.
Эслатиб ўтамиз, ОАВда мамлакат разведка (қидирув) хизмати ходимининг АҚШ жосуси деб қўлга олингани ҳақида хабар тарқалгач, Германия Ташқи ишлар вазирлиги Берлиндаги АҚШ элчиси Жон Эмерсонни ҳузурига чақирган эди.
Айни дамда Spiegel ҳамда Süddeutsche Zeitung нашрларида гумондор шахс Германия Федерал разведка агентлигида ишлагани ва АҚШ жосуси деб айбланаётгани ҳақида маълумот берилди. У АҚШ Миллий хавфсизлик агентлиги томонидан телефонларнинг тингланишига доир тергов билан шуғулланган бундестаг (Германия парламенти) қўмитаси ишлари ҳақидаги маълумотларни АҚШга пул эвазига жўнатганликда гумон қилинмоқда.
Изоҳ (0)