Тошкент шаҳар Чилонзор туманида учта автомобиль иштирокида йўл-транспорт ҳодисаси содир бўлди. Бу ҳақда Facebook’даги «Водители Ташкента» («Тошкент ҳайдовчилари») гуруҳи аъзолари хабар берди.
Фойдаланувчилардан бири гуруҳда йўл-транспорт ҳодисасига гувоҳ бўлгани ҳақида хабар қолдириб, расмларни илова қилган. Унда иккита Lacetti ва битта «Жигули» автомобилининг тамоман пачоқланиб, хароб аҳволга келганини кўриш мумкин. «‘Ҳўл асфалт’ рангидаги Lacetti яп-янги ҳолатда бўлган экан», — деб ёзади гуруҳ аъзоси.
Постга қолдирилган изоҳлардан маълум бўлишича, ҳалокат Чилонзор туманида рўй берган. «Фарҳод бозоридан ‘Ватан’ кинотеатри томонга қараб кетган йўл яқинда таъмирланиб, теп-текис қилинди. Мана энди у ерда кимўзарга баҳслашишмоқда», — дея қайд этган фойдаланувчилардан бири.
Ўша фойдаланувчининг аниқлик киритишича, «Жигули» йўл четида тўхтаб турган, ичида ҳеч ким бўлмаган. «Ҳалокатни Lacetti’даги ёш йигит бошлади», — деб ёзади у. Ҳар иккала Lacetti ҳам юқори тезликда юриб келган. Жигули ва тўқ кулранг рангдаги Lacetti «қайта таъмирлаб бўлмайдиган» аҳволда бўлса, оқ Lacetti уларга нисбатан камроқ зиён кўрган. Ҳайдовчиларнинг қанчалик даражада жароҳат олгани номаълум.
Постга қолдирилган фикрларнинг кўпчилигида ЙТҲ сабабчилари бўлган Lacetti'ларга ачиниш йўқлиги, хаёт уларга сабоқ бергани таъкидланган.
Изоҳларга кўра, ҳалокатда қурбонлар бўлмаган. ЙТҲ, унинг сабаби ва жабрланувчилар ҳақида расмий маълумот берилмаган.
Изоҳ (0)