Зарарига ишламаслик учун «Бухоро» ва «Навоий» аэропортлари авиаташувлар ҳажмини оширади

Ўзбекистон ҳукумати «Ўзбекистон ҳаво йўллари» Миллий авиакомпаниясининг зарарига ишлаётган иккита халқаро аэропорти — «Бухоро» ва «Навоий»ни молиявий-иқтисодий жиҳатдан соғломлаштириш бўйича дастур — «йўл хариталари»ни тасдиқлади. Бу ҳақда UzDaily хабар берди.

«Йўл хариталари»га мувофиқ, ушбу аэропортлар молиявий-иқтисодий аҳволи авиаташувларни кўпайтириш, моддий-техник базани модернизация қилиш ва мустаҳкамлаш, дебитор ва кредитор қарздорликни камайтириш ҳисобига яхшиланади.

Кутилишича, Жанубий Кореянинг Korean Air компанияси «Навоий» аэропорти орқали олиб ўтиладиган юк рейсларини 103 тага, ташув ҳажмини эса 4,2 тоннага оширади.

«Ўзбекистон ҳаво йўллари» МАК Lufthansa ва Turkish Airlines авиакомпаниялари билан музокаралар олиб бориб, уларни юк рейслари парвози ва техник қўнишлар учун «Навоий» аэропортига жалб қилмоқчи.

Шу каби чора-тадбирлар натижасида «Навоий» аэропортининг 2014 йилда 54,74 миллиард сўмлик (2013 йилда 42,916 миллиард сўм) хизмат кўрсатиб, 2,5 миллиард сўмлик фойда (2013 йилда 6,55 миллиард сўмлик зарар) кўриши кутилмоқда.

«Бухоро» аэропортида кўрсатилган хизматлар қиймати эса 2013 йилдаги 18,726 миллиард сўмдан 2014 йилда 22,92 миллиард сўмга ошиши назарда тутилган. Ўтган йилдаги 4,73 миллиард сўмлик зиён ўрнига эса 342 миллион фойда кўриши режалаштирилган.