Shumaxerning o‘limi haqidagi xabar uydirma bo‘lib chiqdi

7-iyun, shanba kuni ijtimoiy tarmoqlarda, keyinroq “Vikipediya”ning rus tilidagi versiyasida Formula-1 poygachisi Mixael Shumaxerning o‘limi haqida ma’lumot paydo bo‘ldi. Biroq poygachi yotgan shifoxonadagilar bu mish-mishni tezda rad etdi.

Dastlab bunday xabar bir nechta yangilik saytlari orqali e’lon qilindi, ijtimoiy tarmoqlar uni tezda tarqatib yubordi. Sportchining ruscha “Vikipediya”dagi sahifasiga ham uning vafot etgan joyi va sanasi kiritildi.

Grenobldagi shifoxona jonlantirish bo‘limi mudiri professor Jan-Fransua Payyen Shumaxerning barqaror holatda ekanini ma’lum qilgan. Shifokor poygachi yashab ketgan taqdirda ham miyasidagi jiddiy jarohat umrining oxirigacha qolishini ta’kidlagan.

Bundan avval ham Shumaxerning o‘limi bilan bog‘liq yolg‘on xabarlar tarqagan. Uni Gazeta.ru’ning Twitter’dagi norasmiy akkaunti go‘yoki AFP’ga tayanib ma’lum qilgan edi.

29-dekabrda mashhur avtopoygachi Mixael Shumaxer Alp tog‘larida chang‘i uchayotib, boshidan jarohat olgan va hozirgacha kasalxonada sun’iy koma holatida, jiddiy nazorat ostida saqlanmoqda. Keyingi kunlarda uning salomatligi barqarorlashganligi aytilmoqda, ammo Shumaxer tildan qolishi va tanasining yarmi ishlamay qolishi ehtimoli mavjudligi haqida ham xabar qilingan.