Izboskan yengil sanoat kasb-hunar kolleji ARM Andijondagi tanlovda g‘olib bo‘ldi

Andijonda “Yilning eng yaxshi axborot-resurs markazi” respublika ko‘rik-tanlovining viloyat bosqichi bo‘lib o‘tdi, deb xabar bermoqda O‘zA.

O‘rta maxsus, kasb-hunar ta’limi muassasalarining axborot-resurs markazlari (ARM) o‘rtasida o‘tkazilgan tanlovda jamoalar o‘zlarining ish faoliyatiga oid ko‘rgazmalar, internetga kirish, ma’lumotlar olish, veb-saytlar hamda elektron pochtadan foydalanish borasidagi bilim va malakasini sinovdan o‘tkazdi.

– Aksariyat akademik litsey va kollejlarda axborot-resurs markazlari tashkil etilgan bo‘lib, ularda badiiy va o‘quv adabiyotlarining elektron nusxalari mavjud, – deydi Andijon viloyati o‘rta maxsus, kasb-hunar ta’limi boshqarmasi bosh mutaxassisi Adhamjon To‘ychiyev. – Ta’lim muassasalari ZioNET internet tarmog‘iga ulangan. Elektron ma’lumot olish, ulardan foydalanish uchun barcha sharoit yaratilgan.

Izboskan yengil sanoat kasb-hunar kolleji axborot-resurs markazi jamoasi tanlovda birinchi o‘rinni egallab, mamlakat bosqichida ishtirok etish huquqini qo‘lga kiritdi. Buloqboshi maishiy xizmat kasb-hunar kolleji jamoasi ikkinchi, Paxtaobod qurilish va kommunal kasb-hunar kolleji jamoasi uchinchi o‘ringa sazovor bo‘ldi.

G‘olib va sovrindorlar tashkilotchilar tomonidan munosib taqdirlandi.