Избоскан енгил саноат касб-ҳунар коллежи ARM Андижондаги танловда ғолиб бўлди

Андижонда «Йилнинг энг яхши ахборот-ресурс маркази» республика кўрик-танловининг вилоят босқичи бўлиб ўтди, деб хабар бермоқда ЎзА.

Ўрта махсус, касб-ҳунар таълими муассасаларининг ахборот-ресурс марказлари (ARM) ўртасида ўтказилган танловда жамоалар ўзларининг иш фаолиятига оид кўргазмалар, интернетга кириш, маълумотлар олиш, веб-сайтлар ҳамда электрон почтадан фойдаланиш борасидаги билим ва малакасини синовдан ўтказди.

– Аксарият академик лицей ва коллежларда ахборот-ресурс марказлари ташкил этилган бўлиб, уларда бадиий ва ўқув адабиётларининг электрон нусхалари мавжуд, – дейди Андижон вилояти ўрта махсус, касб-ҳунар таълими бошқармаси бош мутахассиси Адҳамжон Тўйчиев. – Таълим муассасалари ЗиоНЕТ интернет тармоғига уланган. Электрон маълумот олиш, улардан фойдаланиш учун барча шароит яратилган.

Избоскан енгил саноат касб-ҳунар коллежи ахборот-ресурс маркази жамоаси танловда биринчи ўринни эгаллаб, мамлакат босқичида иштирок этиш ҳуқуқини қўлга киритди. Булоқбоши маиший хизмат касб-ҳунар коллежи жамоаси иккинчи, Пахтаобод қурилиш ва коммунал касб-ҳунар коллежи жамоаси учинчи ўринга сазовор бўлди.

Ғолиб ва совриндорлар ташкилотчилар томонидан муносиб тақдирланди.