Vazirlar Mahkamasining 24-maydagi qarori bilan Oliy ta’lim muassasasining vasiylik kengashi to‘g‘risidagi namunaviy nizom tasdiqlandi.
Hujjat oliy ta’lim muassasalari jamoatchilik boshqaruvining samarali tizimini yanada rivojlantirish, ta’lim jarayonida ijtimoiy sheriklik tamoyillarini amalga oshirish maqsadida qabul qilindi.
Ushbu Namunaviy nizom Oliy ta’lim muassasasining vasiylik kengashi faoliyatini tartibga soladi, u oliy harbiy ta’lim muassasalariga tatbiq etilmaydi.
Vasiylik kengashi O‘zbekiston Respublikasining har bir oliy ta’lim muassasasida tashkil etiladi. U yuridik shaxs hisoblanmaydi. Kengash o‘z faoliyatini jamoatchilik asosida amalga oshiradi.
Kengash tarkibiga davlat organlarining, nodavlat notijorat tashkilotlarining vakillari, homiylar, shuningdek oliy ta’lim muassasasi faoliyatini takomillashtirish va rivojlantirishdan manfaatdor bo‘lgan boshqa yuridik va jismoniy shaxslar kirishi mumkin.
Kengashning tarkibi tasarrufida tegishli oliy ta’lim muassasasi bo‘lgan vazirlik va idora tomonidan tasdiqlanadi. Kengash, qoidaga ko‘ra, Kengash raisi, raisning o‘rinbosari, kotib va a’zolaridan iborat tarkibda shakllantiriladi.
Kengashning son tarkibi tartibga solinmaydi. Kengashning shaxsiy tarkibi va rahbariyatidagi o‘zgarishlar, qoidaga ko‘ra, bir yilda bir marta amalga oshiriladi.
Oliy ta’lim muassasasining rektori (direktori) lavozimiga ko‘ra Kengash a’zosi hisoblanadi.
Kengash qarori Kengashning majlisda qatnashgan a’zolarining oddiy ko‘pchilik ovozi bilan qabul qilinadi. Ovozlar teng bo‘lgan taqdirda Kengash raisining ovozi hal qiluvchi hisoblanadi.
Kengash mablag‘lari vakillari Kengash a’zolari hisoblanadigan tashkilotlarning, shuningdek Kengash a’zolarining xayriya ehsonlari, ixtiyoriy badallari shaklida Kengash tomonidan oliy ta’lim muassasasiga jalb etiladigan byudjetdan tashqari mablag‘lar, shuningdek qonun hujjatlarida taqiqlanmagan boshqa mablag‘lar hisobiga shakllantiriladi. Kengash mablag‘lari mol-mulk, pul mablag‘lari, boshqa moddiy va nomoddiy aktivlar shaklida kiritiladi.
Tasarrufida oliy ta’lim muassasalari bo‘lgan vazirliklar, davlat qo‘mitalari va idoralarga bir oy muddatda tasarrufidagi oliy ta’lim muassasalarida vasiylik kengashlari tashkil etilishini va ularning shaxsiy tarkibi tasdiqlanishini; o‘zlari qabul qilgan normativ-huquqiy hujjatlarning ushbu qarorga muvofiqlashtirilish yuklatildi.
Izoh (0)