AQShning Chikago shahri restoranida bolalarga sharbat o‘rniga adashib spirtli ichimlik berishdi. Natijada ular zaharlanib, kasalxonaga yotqizildi, deb yozadi “ITAR-TASS”.
Mahalliy ommaviy axborot vositalarining 9-aprel kuni xabar qilishlaricha, o‘n nafar bola zaharlangan, ulardan eng kattasi 10 yoshda. Aslida bolalardan birining tug‘ilgan kunini nishonlash uchun ular ota-onalari bilan birgalikda mahalliy restoranga borishgan. Mehmonlar sharbat buyurtirishgan, ammo ofitsiantlar adashib, spirt aralashtirilgan mevali ichimlik olib kelishgan.
“Bu sharbatda qandaydir g‘alatiroq ta’m bor edi, ammo avvaliga bunga uncha ahamiyat bermadik”, – deydi bolalardan birining onasi.
Ofitsiantlar o‘z xatolarini payqab qolishgach, sezdirmasdan spirtli ichimliklarni olib ketib, o‘rniga stolga haqiqiy sharbat qo‘yishga harakat qilishgan. Ammo kech bo‘lgan edi: bolalar o‘zlarini yomon his eta boshlashgan va ularni zaharlanish alomatlari bilan shifoxonaga yotqizishgan.
Shifokorlarning so‘zlariga ko‘ra, ayni paytda bolalarning ahvoli barqarorlashgan, ularning hayoti xavf ostida emas. Bolalarga spirtli ichimlik bergan restoran ma’muriyatiga nisbatan qanday chora ko‘rilishi xabarda aytilmagan.
Izoh (0)