АҚШнинг Чикаго шаҳри ресторанида болаларга шарбат ўрнига адашиб спиртли ичимлик беришди. Натижада улар заҳарланиб, касалхонага ётқизилди, деб ёзади «ИТАР-ТАСС».
Маҳаллий оммавий ахборот воситаларининг 9 апрель куни хабар қилишларича, ўн нафар бола заҳарланган, улардан энг каттаси 10 ёшда. Аслида болалардан бирининг туғилган кунини нишонлаш учун улар ота-оналари билан биргаликда маҳаллий ресторанга боришган. Меҳмонлар шарбат буюртиришган, аммо официантлар адашиб, спирт аралаштирилган мевали ичимлик олиб келишган.
«Бу шарбатда қандайдир ғалатироқ таъм бор эди, аммо аввалига бунга унча аҳамият бермадик», – дейди болалардан бирининг онаси.
Официантлар ўз хатоларини пайқаб қолишгач, сездирмасдан спиртли ичимликларни олиб кетиб, ўрнига столга ҳақиқий шарбат қўйишга ҳаракат қилишган. Аммо кеч бўлган эди: болалар ўзларини ёмон ҳис эта бошлашган ва уларни заҳарланиш аломатлари билан шифохонага ётқизишган.
Шифокорларнинг сўзларига кўра, айни пайтда болаларнинг аҳволи барқарорлашган, уларнинг ҳаёти хавф остида эмас. Болаларга спиртли ичимлик берган ресторан маъмуриятига нисбатан қандай чора кўрилиши хабарда айтилмаган.
Изоҳ (0)