Buxoro viloyatida 430,7 tonna Ai-80 markali avtobenzinni noqonuniy ravishda ulgurji sotib yuborgan MCHJ aniqlandi, deb xabar bermoqda “O‘zenergoinspeksiya”.
Inspeksiyaning Buxoro viloyat hududiy boshqarmasi tomonidan o‘tkazilgan nazorat tadbirida Kogon tumani “O‘ba cho‘li” MFYda joylashgan “N.P.” MCHJga qarashli avtomobillarga yoqilg‘i quyish shoxobchasida neft mahsulotlarining sotuvga chiqarilishi bo‘yicha noqonuniy holat qayd etilgan.
“N.P.” MCHJga qarashli avtomobillarga yoqilg‘i quyish shoxobchasi ish faoliyatida bo‘lmasa-da, “Buxoro neft bazasi” MCHJdan jami 430,7 tonna (3,7 milliard so‘mlik) Ai-80 markali benzin shoxobcha sig‘imlariga tushirilmasdan, avtotsisterna orqali ulgurji sotib yuborilgan.
Mazkur holat yuzasidan qoidabuzarlikka yo‘l qo‘ygan ushbu AYQSH birja savdolarida ishtirok etishi vaqtincha to‘xtatildi.
Bundan avval Raqobat qo‘mitasi Buxoro viloyatidagi 47 ta avtomobilga gaz to‘ldirish shoxobchalariga nisbatan raqobatga qarshi til biriktirishlar yuzasidan tegishli choralar ko‘rgani haqida xabar berilgan edi. Olib borilgan o‘rganishlar davomida narxlarni bir vaqtda yoki ketma-ketlikda oshirib (narxlarni oshirish davri 2024-yil 5-dekabrdan 13-dekabrga qadar) iste’molchilarga sotish orqasidan asossiz daromad olingani ma’lum bo‘lgandi.
Andijon viloyatida faoliyat yurituvchi 18 ta xo‘jalik yurituvchi subyektlari sifatsiz benzin ortidan 128 million so‘mga yaqin daromad qilgani aniqlangandi.
Izoh (0)