Бухоро вилоятида 430,7 тонна Аи-80 маркали автобензинни ноқонуний равишда улгуржи сотиб юборган МЧЖ аниқланди, деб хабар бермоқда “Ўзэнергоинспекция”.
Инспекциянинг Бухоро вилоят ҳудудий бошқармаси томонидан ўтказилган назорат тадбирида Когон тумани “Ўба чўли” МФЙда жойлашган “Н.П.” МЧЖга қарашли автомобилларга ёқилғи қуйиш шохобчасида нефть маҳсулотларининг сотувга чиқарилиши бўйича ноқонуний ҳолат қайд этилган.
“Н.П.” МЧЖга қарашли автомобилларга ёқилғи қуйиш шохобчаси иш фаолиятида бўлмаса-да, “Бухоро нефть базаси” МЧЖдан жами 430,7 тонна (3,7 миллиард сўмлик) Аи-80 маркали бензин шохобча сиғимларига туширилмасдан, автотцистерна орқали улгуржи сотиб юборилган.
Мазкур ҳолат юзасидан қоидабузарликка йўл қўйган ушбу АЁҚШ биржа савдоларида иштирок этиши вақтинча тўхтатилди.
Бундан аввал Рақобат қўмитаси Бухоро вилоятидаги 47 та автомобилга газ тўлдириш шохобчаларига нисбатан рақобатга қарши тил бириктиришлар юзасидан тегишли чоралар кўргани ҳақида хабар берилган эди. Олиб борилган ўрганишлар давомида нархларни бир вақтда ёки кетма-кетликда ошириб (нархларни ошириш даври 2024 йил 5 декабрдан 13 декабрга қадар) истеъмолчиларга сотиш орқасидан асоссиз даромад олингани маълум бўлганди.
Андижон вилоятида фаолият юритувчи 18 та хўжалик юритувчи субъектлари сифатсиз бензин ортидан 128 миллион сўмга яқин даромад қилгани аниқланганди.
Изоҳ (0)