Qamashilik haydovchi tumanda benzin narxi tushmaganidan shikoyat qildi

Qashqadaryo viloyatining Qamashi tumanidagi yonilg‘i quyish shoxobchasida Ai-80 benzini 4500 so‘mdan sotilmoqda, deya “Daryo”ga haydovchi Akmal Nodirov shikoyat qilgan.

“Ko‘p joylarda Ai-80 benzini 4000 so‘m. Lekin Qamashi tumanida eski narx — 4500 so‘mdan sotilmoqda”, — deb “Langar asl invest” MChJga qarashli yonilg‘i quyish shoxobchasidan olgan xarid chekini taqdim qilgan.

“Ikki-uch kun ilgari ham shu ‘zapravka’ga kirganimda 4500 so‘mdan sotishayotganini ko‘rib, e’tiroz bildirgandim. ‘Bizda hali eski narxda sotilyapti. Bizgacha yangi narx kelmagan deyishgandi’, — deydi narxdan norozi haydovchi.

Masalaga oydinlik kiritish maqsadida tumandagi “zapravka” rahbarlaridan biri bilan suhbatlashdik.

“Biz ham 4500 so‘mdan sotyapmiz, boisi ayni kunda sotilayotgan Ai-80 benzinini 27-aprel kuni eski narxda olib kelganmiz. 200 litr qolgan. Zarar qilmaslik uchun oldingi narxda sotishga majburmiz”, — deydi shaxsi sir qolishini so‘ragan yonilg‘i quyish shoxobchasi rahbarlaridan biri.

Eslatib o‘tamiz, “O‘zbekneftgaz” joriy yil 29-apreldan boshlab Ai-92 markadagi benzin narxini 500 so‘mga arzonlatib, 5500 so‘m qilib belgilanishini xabar qildi. 3-maydan boshlab esa Ai-80 benzini ham 500 so‘mga pasayib, 4000 so‘mdan sotish yo‘lga qo‘yildi.