Toshkentda 1—25-aprel kunlari issiq suv taʼminotini uzmagan holda isitish tarmoqlarini gidravlik sinovdan o‘tkazish ishlari amalga oshiriladi. Bu haqda Veolia Energy Tashkent kompaniyasi xabar berdi.
Qayd etilishicha, ushbu sinovlar isitish mavsumiga yuqori sifatli tayyorgarlik ko‘rish, shuningdek, isteʼmolchilarga issiq suv taʼminotini cheklamasdan amalga oshiriladi.
Sinovlar davomida issiqlik tarmoqlari quvurlari shikastlanishi va issiq suv yo‘llar va yo‘laklarga chiqishi mumkin. Haydovchilar, piyodalar hamda maʼmuriy va turar joy binolaridagi yurtdoshlarimizdan eʼtiborli va ehtiyotkor bo‘lishlarini so‘raymiz, — deyiladi xabarda.
Nosozliklar aniqlangan taqdirda (78) 129-01-85 telefon raqami orqali maʼlum qilish so‘raladi.
Eslatib o‘tamiz, poytaxtda 6-noyabrdan isitish mavsumi boshlangan va 26-martdan yakunlangan edi. 2023-yil yakuniga ko‘ra, yuridik shaxslar uchun issiqlik taʼminoti xizmatlari tariflari 1,5 baravarga, byudjet muassasalari uchun esa 1,6 barobarga oshgandi. O‘shanda aholi uchun tarif o‘zgarishsiz qolgandi, Veolia Energy kompaniyasining issiqlik taʼminoti uchun bazaviy tarifi 67,3 foizga — 664 465 so‘mga oshgan.
Izoh (0)