Тошкентда 1—25 апрель кунлари иссиқ сув таъминотини узмаган ҳолда иситиш тармоқларини гидравлик синовдан ўтказиш ишлари амалга оширилади. Бу ҳақда Veolia Energy Tashkent компанияси хабар берди.
Қайд этилишича, ушбу синовлар иситиш мавсумига юқори сифатли тайёргарлик кўриш, шунингдек, истеъмолчиларга иссиқ сув таъминотини чекламасдан амалга оширилади.
Синовлар давомида иссиқлик тармоқлари қувурлари шикастланиши ва иссиқ сув йўллар ва йўлакларга чиқиши мумкин. Ҳайдовчилар, пиёдалар ҳамда маъмурий ва турар жой биноларидаги юртдошларимиздан эътиборли ва эҳтиёткор бўлишларини сўраймиз, — дейилади хабарда.
Носозликлар аниқланган тақдирда (78) 129-01-85 телефон рақами орқали маълум қилиш сўралади.
Эслатиб ўтамиз, пойтахтда 6 ноябрдан иситиш мавсуми бошланган ва 26 мартдан якунланган эди. 2023 йил якунига кўра, юридик шахслар учун иссиқлик таъминоти хизматлари тарифлари 1,5 бараварга, бюджет муассасалари учун эса 1,6 баробарга ошганди. Ўшанда аҳоли учун тариф ўзгаришсиз қолганди, Veolia Energy компаниясининг иссиқлик таъминоти учун базавий тарифи 67,3 фоизга — 664 465 сўмга ошган.
Изоҳ (0)