Toshkent shahar hokimining Veolia Energy Tashkent MCHJ XK tomonidan ko‘rsatiladigan issiqlik ta’minoti xizmatlari uchun tartibga solinadigan yangi narxlarni tasdiqlashga oid qarori qabul qilindi.
Qarorga ko‘ra, 2023-yil 1-dekabrdan Veolia Energy Tashkent MCHJ XK tomonidan ko‘rsatiladigan issiqlik ta’minoti xizmatlari uchun tartibga solinadigan bazaviy narxlar qo‘shilgan qiymat solig‘isiz 664 465 so‘m/Gkal darajasida, bunda:
- aholi uchun — 91 960 so‘m/Gkal;
- yuridik shaxslar uchun — 212 660 so‘m/Gkal;
- budjet tashkilotlari uchun 801 963 so‘m/Gkal darajasida tasdiqlandi.
Ta’kidlanishicha, markazlashgan issiqlik ta’minoti tariflarini budjet tashkilotlari va boshqa yuridik shaxslar uchun keskin oshib ketishining oldini olish maqsadida investitsion xarajatlar tarif strukturasidan alohida hisobga olingan. Shuningdek, iste’molchilar bilan hisob-kitoblar isitish davrining har bir kuniga 1 kvadrat metr isitiladigan maydon hisobida to‘lash tizimiga o‘tkazilgan.
Avvalroq tariflar o‘rtasidagi farq Toshkent budjetidan (baʼzan respublika budjetidan) subsidiyalar hisobidan qoplanadi, yaʼni narxlar ko‘tarilishi fuqarolar va tadbirkorlik subyektlariga, shu jumladan, bilvosita — ularning soliqlari hisobiga taʼsir qilishi aytilgandi. 2023-yilda issiqlik taʼminoti korxonalarining yo‘qotishlarini qoplash uchun davlat budjetidan 1,8 trillion so‘m, 2024-yilda esa 4,5 trillion so‘m ajratilishi rejalashtirilgan. Issiqlik taʼminoti tarmog‘i va jamoat transporti uchun to‘lovlar miqdorining keskin oshishini 1-oktyabrdan gaz va elektr energiyasi narxi oshgani, shu sababli issiqlik elektr stansiyalari va avtobuslar yoqilg‘ini oshirilgan narxlarda xarid qilayotgani bilan izohlash mumkin.
Izoh (0)