Toshkent shahri Bektemir tumanida fuqarolarga qalbaki pullarni o‘tkazib kelgan ikki yigit ushlangan. Bu haqda shahar IIBB axborot xizmati xabar berdi.
Qayd etilishicha, Bektemir tumanida A. ismli yigit telefonini sotmoqchi bo‘lganida unga ikki yigit xaridor bo‘ladi. Yigitlar telefonni fuqaro A.dan 300 dollarga sotib olgan va unga pullarni berib ketgan. Biroq ko‘p o‘tmasdan pullar qalbaki ekani ma’lum bo‘lgan.
Fuqaro A. darhol IIBga murojaat qilgan. IIB xodimlarining tezkor surishtiruvlari natijasida qalbaki dollarlarni berib ketgan 34 va 26 yoshli yigitlar ushlangan.
Dastlabki surishtiruvda ikki yigit o‘zaro til biriktirib, tanishidan olgan soxta 1,6 ming dollar bilan fuqarolarni aldab kelayotgani aniqlangan.
Qayd etilishicha, holat yuzasidan Bektemir tumani IIB tomonidan Jinoyat kodeksining 176-moddasi (qalbaki pul, aksiz markasi yoki qimmatli qog‘ozlar yasash, ularni o‘tkazish) 2-qismi “v” bandi bilan jinoyat ishi qo‘zg‘atilgan. Ikki yigitga nisbatan qamoqqa olish ehtiyot chorasi qo‘llangan. Hozirda tergov harakatlari olib borilmoqda.
Bundan oldin Navoiy viloyati IIB TQX Jinoyat qidiruv bo‘limi, DXX Navoiy viloyati boshqarmasi va departament xodimlari bilan hamkorlikda o‘tkazilgan tezkor tadbirda jinoiy guruh tomonidan 400 million so‘m soxta pullar 160 million so‘m haqiqiy pullarga almashtirilayotgan paytda qo‘lga olingandi. Aprel boshlarida esa Toshkent shahri Yangihayot tumanida xaridor qalbaki pulga iPhone sotib olgani, Toshkent viloyati Angren shahrida qalbaki pullar muomalaga kiritilishining oldi olingani to‘g‘risida xabar berilgandi.
Izoh (0)