Toshkentning Yakkasaroy tumanida yo‘l talashib janjallashgan haydovchining avtomashinasida psixotrop dori vositalari borligi aniqlandi, deb xabar beradi Milliy gvardiya matbuot xizmati.
Qayd etilishicha, 23-mart kuni Yakkasaroy va Sergeli tumanlarini bog‘lovchi yangi qurilayotgan ko‘prik hududida jamoat tartibini saqlashga masʼul Milliy gvardiya xodimlari xizmat vazifasini bajarayotgan vaqtda, soat 16:00 lar atrofida ko‘prik tagidagi kichik halqa yo‘lida Spark va Lacetti rusumli avtomashina haydovchilari o‘rtasida yo‘l talashish oqibatida kelishmovchilik yuzaga kelib janjallashayotganini ko‘rib qolgan.
Milliy gvardiya xodimlari PPXga xabar qilgan holda voqea joyiga yetib borib, fuqarolarni tinchlantirish choralarini ko‘rgan. Shu paytda PPX xodimlarini uzoqdan kelayotganini ko‘rgan Spark rusumli avtomashina haydovchisi mashinasining old qismidan o‘ziga tegishli bo‘lgan buyumlarni olib orqa yuk xonasiga joylashtirgan holda voqea joyidan ketishga va yashirinishga uringan.
Chaqiruvga asosan yetib kelgan PPX va Milliy gvardiya xodimlari tomonidan ushbu avtomashina to‘xtatilib, ko‘zdan kechirilganda avtomashina orqa o‘rindig‘idan qora paketga o‘ralgan 10 dona “Zardex” hamda 10 ta qutida “Regapen” jami 154 dona oq va qizil rangli psixotrop moddalari aniqlangan.
Yakkasaroy tumani IIO xodimlari tomonidan olib borilgan dastlabki surishtiruv ishlari davomida Spark rusumli avtomashina haydovchisi fuqaro X.O. ekani aniqlangan. Hozirda holat yuzasidan surishtiruv ishlari davom ettirilmoqda.
Bundan oldin Toshkentda kuchli taʼsir qiluvchi moddalarning noqonuniy savdosiga chek qo‘yilgani, Farg‘ona viloyatining Qo‘qon shahrida kuchli ta’sir qiluvchi dori vositalarini sotayotgan dorixona aniqlangani to‘g‘risida xabar berilgandi.
Izoh (0)