Тошкентнинг Яккасарой туманида йўл талашиб жанжаллашган ҳайдовчининг автомашинасида психотроп дори воситалари борлиги аниқланди, деб хабар беради Миллий гвардия матбуот хизмати.
Қайд этилишича, 23 март куни Яккасарой ва Сергели туманларини боғловчи янги қурилаётган кўприк ҳудудида жамоат тартибини сақлашга масъул Миллий гвардия ходимлари хизмат вазифасини бажараётган вақтда, соат 16:00 лар атрофида кўприк тагидаги кичик ҳалқа йўлида Spark ва Lacetti русумли автомашина ҳайдовчилари ўртасида йўл талашиш оқибатида келишмовчилик юзага келиб жанжаллашаётганини кўриб қолган.
Миллий гвардия ходимлари ППХга хабар қилган ҳолда воқеа жойига етиб бориб, фуқароларни тинчлантириш чораларини кўрган. Шу пайтда ППХ ходимларини узоқдан келаётганини кўрган Spark русумли автомашина ҳайдовчиси машинасининг олд қисмидан ўзига тегишли бўлган буюмларни олиб орқа юк хонасига жойлаштирган ҳолда воқеа жойидан кетишга ва яширинишга уринган.
Чақирувга асосан етиб келган ППХ ва Миллий гвардия ходимлари томонидан ушбу автомашина тўхтатилиб, кўздан кечирилганда автомашина орқа ўриндиғидан қора пакетга ўралган 10 дона “Зардех” ҳамда 10 та қутида “Регапен” жами 154 дона оқ ва қизил рангли психотроп моддалари аниқланган.
Яккасарой тумани ИИО ходимлари томонидан олиб борилган дастлабки суриштирув ишлари давомида Spark русумли автомашина ҳайдовчиси фуқаро Х.О. экани аниқланган. Ҳозирда ҳолат юзасидан суриштирув ишлари давом эттирилмоқда.
Бундан олдин Тошкентда кучли таъсир қилувчи моддаларнинг ноқонуний савдосига чек қўйилгани, Фарғона вилоятининг Қўқон шаҳрида кучли таъсир қилувчи дори воситаларини сотаётган дорихона аниқлангани тўғрисида хабар берилганди.
Изоҳ (0)