Toshkent shahar IIBB xodimlari boshqa huquqni muhofaza qiluvchi organlar bilan hamkorlikda giyohvandlik vositalari, psixotrop moddalar va ularning analoglari bilan qonunga xilof ravishda muomala qilish faktlarini aniqlash va ularga chek qo‘yish borasida samarali ishlarni davom ettirmoqda. Bu haqda poytaxt IIBB axborot xizmati xabar berdi.
Maʼlum qilinishicha, 12-13-fevral kunlari o‘tkazilgan tezkor tadbirlar davomida Chilonzor tumanida kuchli taʼsir qiluvchi moddalarning muomalasi bilan bog‘liq holat aniqlangan. O‘zini shubhali tutgan ikki nafar shaxslar xodimlar tomonidan to‘xtatildi.
Xolislar ishtirokida tekshirilgan 29 yoshli Shohrux Muxammedov va 25 yoshli Abdulvosit Muxammedovning yonida, shuningdek Sh.Muxammedovga tegishli Spark avtomobil salonida 53 dona “Zardeks” kapsulalari aniqlanib, ashyoviy dalil sifatida rasmiylashtirib olingan.
Suhbat davomida gumonlanuvchilar ushbu moddalarni 29 yoshli Shohumardan noqonuniy ravishda sotib olganliklarini maʼlum qilgan. Tezkor tadbir davomida xodimlar kuchli taʼsir qiluvchi dori vositalarini noqonuniy sotish bilan shug‘ullangan Shohumar Yo‘ldoshevni qo‘lga olgan.
Uning yashash manzili xolislar ishtirokida tekshirilganda, 1 939 dona “Zardeks” nomli kuchli taʼsir qiluvchi dori vositalari aniqlanib, ashyoviy dalil sifatida rasmiylashtirib olingan.
Mazkur holat yuzasidan gumonlanuvchilarga nisbatan Jinoyat kodeksining 273- (giyohvandlik vositalari, ularning analoglari yoki psixotrop moddalarni o‘tkazish maqsadini ko‘zlab qonunga xilof ravishda tayyorlash, olish, saqlash va boshqa harakatlar qilish, shuningdek ularni qonunga xilof ravishda o‘tkazish), 251-1-moddalari (kuchli taʼsir qiluvchi yoki zaharli moddalarni qonunga xilof ravishda muomalaga kiritish) bilan jinoyat ishi qo‘zg‘atilgan. Tergov davom etmoqda.
Izoh (0)