Taxtaqoracha dovonida uch toifadagi transport vositalari harakati vaqtincha cheklandi. Bu haqda Qashqadaryo viloyati hokimligi matbuot xizmati xabar berdi.
Qayd etilishicha, xalqaro ahamiyatga ega M39 Toshkent—Termiz avtomobil yo‘lining Taxtaqoracha dovonida yo‘l torligi, xavfli burilish joylarining radiusi kichikligi, oldinda harakatlanib ketayotgan yuk transport vositalarining sekin harakatlanishi tufayli quvib o‘tishning imkoni bo‘lmagani sababli noqulayliklar tug‘dirmoqda.
Shuni inobatga olib, Toshkent—Termiz avtomobil yo‘lining Taxtaqoracha dovoni hisoblangan 1135–1145-kilometrlari oralig‘ida harakat xavfsizligini ta’minlash va yo‘l-transport hodisalarining oldini olish maqsadida yo‘lovchilarni tashish uchun mo‘ljallangan quyidagi toifadagi transport vositalarining harakatlanishi vaqtincha cheklangan:
- M2 — yo‘lovchilarni tashish uchun foydalaniladigan va haydovchining o‘rindig‘idan tashqari o‘rindiqlar soni 8 tadan ortiq, eng katta vazni 5 tonnadan ortiq bo‘lmagan avtotransport vositalari;
- M3 — yo‘lovchilarni tashish uchun foydalaniladigan va haydovchining o‘rindig‘idan tashqari o‘rindiqlar soni 8 tadan ortiq, eng katta vazni 5 tonnadan ortiq bo‘lgan avtotransport vositalari;
- N3 — yuk tashish uchun mo‘ljallangan, eng katta vazni 12 tonnadan ortiq bo‘lgan avtotransport vositalari.
Cheklov ushbu yo‘lda aniqlangan kamchiliklar hamda avtomobil yo‘li III toifadan II toifaga o‘zgartirgunga qadar kuchda qoladi.
Izoh (0)