Toshkent—Andijon va Toshkent—Samarqand pulli avtomobil yo‘llari 2026-yilgacha qurib bitkaziladi. Bu haqda Davlat-xususiy sheriklikni rivojlantirish agentligi direktori Zokir Bozorov ma’lum qildi.

Qayd etilishicha, 2022—2026-yillarda transport sohasida amalga oshirilishi rejalashtirilgan 5 ta yirik loyiha bo‘yicha hujjatlar tayyorlash va o‘rganish ishlari davom etmoqda.

Bular:

• Jahon banki maslahat ko‘magida amalga oshirilayotgan Toshkent—Andijon pullik avtomobil yo‘lini qurish loyihasi;
• Yevropa tiklanish va taraqqiyot banki maslahat ko‘magida amalga oshirilayotgan Toshkent—Samarqand pullik avtomobil yo‘lini qurish loyihasi;
• Samarqand va Shahrisabz shaharlari orasida 66 kmlik avtomobil yo‘li va Taxtaqoracha dovonida 4,4 kmlik tunnel qurish loyihasi.

Transport sohasida 2019—2022-yillar davomida 7 ta loyihani amalga oshirish bo‘yicha ishlar olib borilayotgan bo‘lib, shundan 2 ta loyiha bo‘yicha DXSH bitimi imzolangan.

Eslatib o‘tamiz, O‘zbekistondagi ilk pulli yo‘llarning qurilishi haqida 2018-yilda xabar berilgandi. O‘shanda bu kabi yo‘llarning birinchisini qurish bilan Germaniyaning GP Günter Papenburg kompaniyasi shug‘ullanishi mumkinligi aytilgandi. 2019-yilda Avtomobil yo‘llari qo‘mitasi O‘zbekistondagi ilk pulli trassani qurish uchun joy tanlanayotganini ma’lum qilgandi.

Mavzuga doir: O‘zbekistonda avtomobillar uchun pulli yo‘llar narxi qancha bo‘lishi ma’lum qilindi. Unda mashinalar 150 km tezlikda harakatlanishi mumkin bo‘ladi